Gipaspasan sa Land Transportation Office Region-7 ang pagpagawas sa mga backlog ug wala ma-claim nga mga plaka sa sakyanan sa Central Visayas, subay sa direktiba ni Presidente Marcos Jr.
Ang maong inisyatiba gipangunahan ni LTO-7 Regional Director Glen G. Galario, kinsa personal nga nakigtagbo sa nagkalain-laing opisyal sa lokal nga kagamhanan aron masiguro ang ilang kooperasyon sa distribution campaign.
Sumala ni Galario, nagsuta na sila sa rehiyon ug nakigtagbo sa mga Mayor ug Gobernador aron mangayo sa ilang suporta alang sa mas daling pag-apod-apod sa plaka.
Dugang niya, nalipay sila sa mabungahong katuyuan kay andam nga makig-coordinate sa ilan buhatan ug maghatag mga lugar diin ang mga motorista makaangkon sa ilang mga plaka.
Usa sa labing bag-ong LGU nga nisaad og suporta mao ang Probinsiya sa Bohol, pinangulohan ni Gobernador Erico Aristotle Aumentado, kinsa nitugot sa paggamit sa Bohol Provincial Capitol isip plate distribution site, ug kini gikompirmar ni Galario.
Subay niini, nipahimangno si Galario sa mga tag-iya og sakyanan nga magdala og mga photocopies sa ilang official receipt (OR), certificate of registration (CR), ug valid ID sa pag-claim sa ilang mga plaka, samtang alang sa mga motorista, giawhag niya nga susihon ang status ug lokasyon sa ilang mga plaka pinaagi sa opisyal nga website nga ltotracker.com sa dili pa mobiyahe sa bisan unsang distribution center.
Sa tumong sa pagpalapad sa nahisgutang inisyatiba, nakig-alayon usab ang LTO 7 sa Kagamhanan sa Dakbayan sa Lapu-Lapu alang sa pag-apod-apod sa mga plaka sa motorsiklo sa lebel sa barangay, usa ka lakang nga nakita nga makapaduol sa mga serbisyo ngadto sa katawhan.
Gani, kagahapong adlawa, Agosto 18, si Mayor Cindi King-Chan maoy nangulo sa pagsugod sa barangay-level plate distribution sa dakbayan sa Lapu-Lapu.
Busa, ang susamang mga paningkamot gituki karon sa Cebu City ug Mandaue City human sa diskusyon nila ni Liga ng mga Barangay–Cebu City Chapter President Franklyn Ong ug Mayor Jonas Cortes aron mapatuman ang samang estratehiya sa ilang gisakopang lokalidad.
