Gibutyag sa Land Transportation Office – Central Visayas nga mikunhod ang mga numero sa mga madakpan sa illegal muffler modification tungod sa subsub nga operasyon nga gipahigayun sa mga national highway sa dakbayan sa Sugbo ning adlaw nga Byernes, Pebrero 27, 2026.
Matud ni Atty. Vicente Bien Santiago, ang Chief Operations sa LTO 7, nga kaniadto sa sugod sa operasyon muabot sa dili muminus 20 ka mga motorsiklo matag adlaw ang madakpan, apan ning kasamtangan anaa lang sa pito ka mga motorsiklo ang ma-impound.
Apan dili gihapon malikayan nga anaa pa gihapoy madakpan susama sa kasagarang after market pipe og modification sa stock pipe nga ginadili gihapon sa maong ahensya tungod sa kasaba niini sa kumunidad.
Dugang pa niini, anaa usab mga nadakpan nga mga motorista sa lain-lain usab nga hinungdan sama sa pagsul-ob og bucket helmet, tsinelas og ingon man wala mag seat-belt.
Gihimug-atan ni Santiago, nga mahinungdanon usab ang pagpakig-alayon og hugot nga pagpatuman sa mga Local Government Units sa pagpakigbatok sa mga motorista nga naggamit og modified mufflers.
Hinungdan nga milaom kini nga mas dali ang pagpatuman niini sa publiko.
