Gikiha ngadto sa Office of the Ombudsman si Land Transportation Office – Central Visayas (LTO-7) Regional Director Glen Galario tungod sa giingong kaylap nga operasyon sa kolorum nga mga pampublikong sakayan sa rehiyon.
Duha ka kaso ang giatubang ni Galario diin nagpunto kini sa paglapas sa Section 3, RA 3019 (Anti-Graft and Corrupt Practices Act).//
Ang unang kasong giatubang ni Galario kay napasar niadtong Agosto 13 sa usa ka Pablo Dignos.
Gisaysay sa dokumentong gisumiter ni Dignos nga matod pa adunay mga operasyon sa mga tourist vans nga giaghat sa pagbaya og suborno nga may koneksyon sa LTO-7 aron maka-operate sila ug libkas na sa permit gikan sa Land Transportation Franchising and Regulatory Board (LTFRB).
Gihulagway sa unang reklamante nga daw sindikato ang maong modus operandi diin maahat og tugot ang mga operator aron mapadali ang transaksyon sa buhatan.
Dugang pa nga dili lang daw sa Sugbo kaylap ang kolorum apan apil sa lalawigan sa Bohol nga wala tagai og pagtagad ug aksyon sa LTO-7.
Sumala pa nga aron timailhan nga nakabayad sila sa illegal nga suborno kay papilitan og sticker ang ilang windshield aron mailhan kini sa mga personahe sa LTO-7.
Kini maoy pipila ka rason nganung nakapa-aghat og reklamo ni Dignos batok kang Galario.
Ingon man ang laing reklamo batok sa Regional Director mao ang gisang-at sa usa ka Rosario Paras diha gihapon sa buhatan sa Ombusdman sa pasangil nga manukot og suborno sa mga chief-of-offices aron mapadali ang transaksyon sa LTO-7 sama sa paglukat og rehistro ug lisensya.
Gitudlo ang usa ka Lara Sgna nga na-assign sa LTO Registration Section sa dakbayan sa Talisay ang giingong kanunay manuot sa suborno nga aduna pay quota nga P150,000 matag semana.
Sa iyang bahin, mipahayag si Galario nga wala pa kini nakadawat sa kopya sa reklamo batok kaniya apan sa higayong madawat na kini kay iya kining i-review ug mangonsulta sa legal nga remedy isip iyang pormal nga tubag.
