Nanlimbasug ug nag-antos sa tumang kalisud ang ubay-ubay nga pamilya ug residente sa Punjab sa Pakistan human sa pinakagrabeng pagbaha nga nasinati niini, nga nakabanlas sa mga panimalay, niguba sa mga pananom, ug nagkutlo sa kinabuhi sa mga kahayupan.
Matod pa sa usa ka mag-uuma nga si Muhammad Amjad, 45-anyos, ang 13 sa iyang 15 ka ektaryang tanoman sa humay ug patatas sa Chiniot, gibanlas lang sa maong baha.
Sa maong panghitabo, ang mga bata ug mga kababay-an namakwit para sa kaugalingong kaluwasan, samtang ang mga kalalakin-an mao ang nagpabilin aron sa pagbantay sa mga kabtangan nga nahabilin.
Sumala sa provincial disaster management authority, kapin duha ka milyon nga mga indibidwal ang naapektohan sa maong pagbaha, ug adunay kapin 2,000 ka mga baryo ang nabahaan.
Samtang, gibana-bana usab nga adunay 760,000 ka mga tao ug 516,000 ka mga hayop ang gipamakwit, ug aduna nay 33 ka gidaghanon nga natala sa mga namatay.
