Gipadayag ni Senate President Pro Tempore Jinggoy Ejercito Estrada nga ang magtiayong Discaya ug ilang mga kompaniya nanag-iya og dul-an sa 80 ka mga sakyanan, lakip na ang mga 40 ka mga luxury vehicles.
Sa iyang pagpadayag sa plenaryo sa Senado, si Estrada niingon nga atol sa gipahigayong operasyon sa Bureau of Customs sa usa ka gipanag-iya sa mga Discaya sa Pasig City, tulo lang sa 12 ka mga luxury vehicles ang nakit-an.
Samtang basi sa talaan sa Land Transportation Office (LTO), adunay mga 63 ka mga sakyanan sa ngalan sa magtiayon—gikan sa mainstream brands hangtod sa high-end nga mga sakyanan sama sa Rolls Royce Cullinan, Bentley Bentayga, duha ka GMC Yukon Denali, Cadillac Escalade, Mercedes Benz Wagon G63 ug Range Rover Evoque.
Subay kini sa nasuta sa search warrant sa napalgan sa Bureau of Customs (BOC) atol sa gipahigayong raid sa mga propyedad sa pamilyang Discaya gahapon sa buntag.
Bisan si Sarah Discaya giingong niangkon nga ang iyang pamilya adunay 28 ka luhong mga sakyanan, dose lang niini ang nalista sa search warrant — mga sakyanan nga walay record sa Customs.
