Gitudlo isip undersecretary sa Department of the Interior and Local Government (DILG) si Jed Patrick Mabilog, kinsa kanhing mayor sa Iloilo City.
Kini sumala ni DILG Secretary Jonvic Remulla, human nanumpa si Mabilog kagahapon isip undersecretary for public safety, kinsa motutok sa mga reporma sa lokal nga gobyerno.
Gipaniguro ni Remulla nga si Mabilog wala mangita og panimalos sa pagbalik sa serbisyo publiko.
Mahinumduman nga si Mabilog mibiya sa nasud niadtong 2017 ug nagtago sa Estados Unidos human siya giakusahan ni kanhi Presidente Rodrigo Duterte nga kunohay tigpanalipod sa ilegal nga droga.
Ang kanhi mayor mibalik sa Pilipinas niadtong 2024 human misurender sa National Bureau of Investigation (NBI).
Niadtong Enero 15, 2025, gihatagan siya og executive clemency ni Presidente Ferdinand Marcos Jr., nga nagbukas sa dalan alang sa iyang pagbalik sa serbisyo publiko.
Mahinumduman nga si Mabilog mihimakak sa mga pasangil nga siya ang tigpanalipod sa namatay nga giingong drug lord nga si Melvin Odicta Sr., kinsa gipatay niadtong 2016.
