Magpatuman ang Department of the Interior and Local Government (DILG) og mas hugot nga security measures sa mga eskwelahan aron mapugngan ang pagdala og armas ug uban pang krimen sulod sa school premises.
Sumala ni DILG Secretary Jonvic Remulla, gidasig ang mga pribadong eskwelahan nga hugot nga i-monitor ang mga mosulod sa ilang premises.
Samtang, magbutang og barangay security personnel sa mga pampublikong eskwelahan aron mohimo og mandatory inspection sa mga bag sa mga estudyante.
Tumong sa maong lakang nga malikayan ang pagbalik sa mga insidente sa krimen sulod sa mga eskwelahan.
Dugang ni Remulla, nagplano usab ang Philippine National Police (PNP) og Quick Reaction Force nga mahimong motubag dayon sa mga insidente ug security threats sa mga eskwelahan.
Gipasiugda usab niya ang panginahanglan sa mas hugot nga pagkontrol sa mga armas, lakip ang pagpatuman og mas bug-at nga silot sa mga makapabaya sa ilang service firearms.
