Nangayo og tabang sa gobyerno ang mga mag-uuma sa kabukiran sa Sugbo aron maandam ang ilang mga umahan sa posibleng epekto sa El Niño, ilabina sa kakulang sa tubig nga dakong hulga sa ilang pagpananom.
Matud ni Gomer Alcantara, usa ka mag-uuma, aduna na silay gagmayng tubod nga ilang gipalambo ug gisementohan kauban sa iyang mga kaubang mag-uuma aron magamit isip tinubdan sa tubig panahon sa huwaw.
Apan, matud pa ni Alcantara, hangtod karon wala pa sila nakadawat og tabang gikan sa gobyerno, bisan alang lamang unta sa pagpa-semento sa ilang mga tubod aron masiguro nga magamit nila kini sa pagpatubig sa ilang mga pananom.
Matud pa niya, dako ang ikatabang sa kasamtangang pag-ulan-ulan sa pagpatubo sa ilang mga tanom, gumikan kay mamahimo silang makatanom og mokabat sa duha ka libo ka punoan, apan kon moabut ang ting-init ug magkulang ang tubig, posible nga mokabat na lamang sa 200 ka punoan ang ilang matanom.
Tungod niini, nanawagan si Alcantara nga samtang wala pa moabot ang grabeng huwaw, mahatagan na unta sila og tabang o mga proyekto gikan sa gobyerno nga makatabang kanila sa pag-andam ug pagtipig og tubig alang sa ilang umahan.
Gipasiugda usab niya nga angay suportahan sa gobyerno ang mga mag-uuma tungod kay dako ang ilang papel sa pagsiguro nga adunay pagkaon ang katawhan.
Matud pa niya, kon walay mga mag-uuma nga mananom ug moani, maapektuhan usab ang suplay sa pagkaon nga gisaligan sa mga konsumidor.
