SOUTH AFRICA-Usa ka ice cream parlor sa South Africa ang nakaabot na sa laing lebel kung diin naghimo kini og ice cream nga ginama sa ulod.
Kini human nga giingong ang maggots o larva sa langaw ang abunda sa protina ug eco-friendly pa.Ang maong ice cream ang gibaligya sa Gourmet Grubb, sa Cape Town, Africa, kun diin giproseso ang larva sa mga langaw para maoy himoong ice cream.
Matud pa nga gamay lamang ang sagol niini itandi sa naandan nga paghimo og ice cream.Inay nga gatas ang gamiton, tubig lamang ang gigamit sa maggot ice cream.
Sigon sa mga naghimo niini nga environmental friendly kini sanglit tubig ug yuta lang ang ilang gigamit para sa pagculture sa mga langaw.
Gawas niini makabenipisyo usab matud pa ang mga konsumidor tungod kay makakuha kini og protina ug uban pang sustansya kung mukaon sila niining maong ice cream.
Daghan usab ang nasorpresa human nga nakatilaw sa maong ice cream diin ang uban nagkanayon nga lami kini.
Hinoon, gi-angkon sa maong ice cream shop nga dili tanan ma-attract niini sanglit matag nasud lahi-lahi man og kultura.
