CEBU – Nalubung ang usa ka pamilya sa quarry site sa Barangay Paz, Poro, isla sa Camotes, probinsya sa Sugbo.
Giila ang mga biktima nga sila si Francisco Monte, 41, Gemmalyn Monte, 33, ug Wilbert Monte, 8.
Gisaysay ni Police Lt. Jose Ruel Nalzaro, acting chief of police sa Poro Police Station nga nanguykuy ug anapog ang pamilyang Monte sa nahisgutang quarry site arun nga isagul sa hollowblocks.
Dali usab nga nakaresponde ang Local Disaster Team sa nahisgutang lugar ug wala magdugay naluwas lang usab ang tulu ka mga biktima.
Nasayran nga una nang nagpagawas ug cease and desist order ang local government sa Poro human nga aduna na’y namatay sa maong quarry site.
Gituhu-an sa kapulisan nga dugay nang gibuhat sa pamilyang Monte ang pagpanguha ug anapog gumikan kay giingung nagtrabaho man sa usa ka himu-anan ug hollowblocks ang amahan nga usa sa nalubung sa anapog.
