Kusganong gihimakak ni kanhi ACT Teachers Party-List Rep. France Castro ang mga pasangil nga giingong nakadawat siya og male-maleta nga kwarta gikan ni kanhi Cong. Zaldy Co.
Sumala ni Castro sa usa ka interbyu sa Bombo Radyo, kini usa ka “orchestrated scheme ng mga Duterte supporters” nga nagtumong sa pag-lihis sa atensyon sa publiko gikan sa mga kaso nga giatubang ni kanhi President Rodrigo Duterte sa International Criminal Court (ICC) ug sa mga panawagan sa impeachment batok kang Bise Presidente Sara Duterte.
Gipasiugda ni Castro nga ang mga pasangil nga gipakatap usa lamang ka organisado nga taktika, susama sa nangaging mga kaso sa harassment nga gisang-at batok kaniya.
Sa miaging tuig, si Castro miingon usab nga ang dinastiya sa politika ni Duterte ang nagpaluyo sa mga reklamo sa etika batok kaniya, isip usa ka paagi aron matabonan ang giingong korapsyon ug pag-abuso sa confidential ug intelligence funds (CIF).
Sa pagkakaron, init nga gihisgutan sa Kongreso ug sa publiko ang gitawag nga maleta scandal, diin daghang kanhing sundalo ang miingon nga nasaksihan nila ang giingong paghatag og mga kickback gikan sa mga proyekto sa pagkontrol sa baha.
Apan alang kang Castro, klaro nga kini kabahin sa mas lapad nga kampanya sa pagpakaulaw batok sa mga progresibong magbabalaod.
