Kusganon nga gipanghimakak sa Malacañang nga gitarget sa gobyerno ang mga Chinese nationals sa nasud human ang Beijing nipagawas og travel advisory alang sa mga lungsuranon niini aron magbantay sa posibleng pagpanghasi sa mga awtoridad sa Pilipinas.
Basi sa travel advisory nga giluwat sa Chinese Embassy in the Philippines, ilang gipahimangnoan ang mga kababayan nga mobiyahe sa nasod nga pakusgon pa ang ilang “security precautions and emergency preparedness” ug likayan ang mga outing tungod kay daghang mga Chinese nga negosyante ug turista ang giingong gihasi ug gipangutana sa mga awtoridad.
Gituohan sa Malacañang nga usa lang ka “normal consular function” ang pag-isyu sa Chinese Embassy og travel advisory alang sa mga lungsuranon niini sa Pilipinas.
Giklaro ni Palace Press Officer USec. Claire Castro nga walay partikular nga nasyonalidad ang gitumong sa mga awtoridad.
Gawas lang kon nalambigit sila sa mga krimen ug ilegal nga kalihokan.
Gihatagan usab og gibug-aton ni Castro nga walay ilhon ang balaod sa Pilipinas, ilabi na kung makalapas kini.
Gibutyag usab ni Castro nga posibleng gitumbok sa Chinese Embassy ang mga Chinese national nga nalambigit sa illegal POGO operations.
Kung kahinumdoman, nipagawas og travel advisory ang Chinese Embassy alang sa ilang mga lungsuranon nga gustong moadto sa Pilipinas aron mohimo og risk assessment tungod sa planong operasyon sa mga awtoridad batok kanila.
Gitataw ni Castro nga andam ug abli ang Department of Foreign Affairs alang sa panag-estorya o diskusyon sa Chinese embassy kalabot sa ilang mga kabalaka.
