Gihimakak sa Malacañang ang mga pasangil sa destabilisasyon ug giinsistir nga si Presidente Ferdinand R. Marcos Jr. matapos ang iyang termino taliwala sa mga taho sa usa ka “assassination plot” batok kaniya.
Kini ang gipahayag ni Palace Press Officer Undersecretary Claire Castro human gipagawas ang testimonya ni Ramil Madriaga sa House impeachment hearing.
Sumala ni Madriaga, giingong adunay mga diskusyon tali sa kampo ni kanhi Presidente Rodrigo Duterte ug pipila ka mga retiradong heneral alang sa usa ka plano nga kusganong tangtangon ang Presidente gikan sa katungdanan sa 2025.
Giklaro ni Castro nga wala’y personal nga kahibalo ang Presidente o ang Palasyo sa gibutyag nga mga panagsulti tali ni Madriaga ug sa kanhi Presidente.
Dugang usab ni Castro nga ang Presidente nangampanya alang sa katawhan, misaad nga moserbisyo sa katawhan, ug misaad nga tapuson ang iyang termino alang sa katawhan.
Ingon man nga gitugyan na sa Palasyo ang imbestigasyon sa giingong hulga sa kamatayon kang Presidente Ferdinand Marcos Jr. ngadto sa National Bureau of Investigation.
Gipasalig usab sa opisyal nga bisan kung ang Presidente naka-focus sa iyang trabaho, ang gobyerno dili mobaliwala sa ingon nga mga seryoso nga hulga.
Gikataho nga mahibal-an sa gobyerno ang hingpit nga kamatuoran luyo niining mga pasangil aron mapadayon ang seguridad sa punong ehekutibo ug ang kalig-on sa nasud.
