PALAWAN-Na-intercept sa mga personahe sa Philippine National Police – Maritime Group (PNP-MG) ang usa ka Malaysian fishing vessel nga nanagat sa kadagatan nga sakop sa Mangsee Island, Balabac, Palawan.
Ang nasangpit nga bangka nakarehistro sa usa ka Malaysian national, apan ang mga tripulante pulos mga Filipino.
Na-intercept kini sa mga otoridad samtang nagpahigayon og patrol operations ang mga operatiba sa 2nd Special Operations Unit sa PNP-MG sa maong kadagatan nga direktang nag-atubang sa West Philippine Sea.
Samtang nasakmit usab sa mga otoridad ang 60kgs nga buhi nga Lapu-Lapu ug 350kgs sa nagkadaiyang klase sa isda.
Ang uban niini nga mga isda gigamit sa mga aquarium.
Apil usab sa mga nasakmit ang 15 ka gagmay nga mga sakayan nga sakop o gigamit sa maong grupo.
Desidido ang PNP-MG nga pasakaan og kaso ang mga nadakpan ilabi na ang pagpanguha ubos sa Republic Act 10654 o ang Fisheries Code of the Philippines.
