Andam na ang Lokal nga Kagamhanan sa Dakbayan sa Mandaue sa pag-welcome sa mga bisita ug delegado sa umaabot nga 45th Association of Southeast Asian Nations (Asean) Tourism Forum (ATF) 2026 karong January 28-30.
Sa gipahigayon nga press briefing, gipadayag ni Mandaue Investment Promotion Tourism Action Center (MIPTAC) Executive Director Kristian Marc Cabahug nga andam na ang Dakbayan sa Mandaue sa pag-atubang sa umaabot nga ATF 2026, subay sa liderato ni Mayor Thadeo “Jonkie” Ouano.
Mitambong sa maong kalihokan si Department of Tourism Secretary Christina Garcia Frasco nga mihatag og update sa preparasyon.
Ang ATF usa ka dakong regional forum sa mga member countries sa Asean diin mag-abot ang mga prime ministers, senior government officials, exhibitors, tourism stakeholders, media ug international buyers.
Ikaduha na kini nga higayon nga ang Cebu nag host sa ATF kaniadtong 1998 diin ang Asean Tourism Ministers meeting gipahigayon sa Cebu City. Ang Dakbayan sa Lapu-Lapu maoy host karong tuig nga miting.
Gihisgotan usab sa miting ang mga plano sa pagpatuman og traffic advisory aron mapadayon ang kahapsay sa dagan sa trapiko atol sa kalihokan.
Mag-deploy usab og mga Philippine National Police (PNP) personnel aron maseguro ang kaluwasan ug seguridad sa mga bisita ug delegado.
Ang ATF motak-op pinaagi sa Asean Travel Exchange kun Travex travel-trade event gikan January 28-30, 2026, didto sa Mactan Expo sa Lapu-Lapu City, diin adunay networking sessions, appointments, cultural showcases, ug business exchanges sa stakeholders sa turismo sa Asean.
Nitambong usab sa maong press briefing sila Asean Office of the Director General for Operations Deputy Director General Angela Javier, Lapu-Lapu City Mayor Ma. Cynthia Chan, chief sa Regional Community Affairs and Development Group Police Colonel Kimberly Molitas; Cebu Provincial Tourism Office Head Rowena Lu Montecillo, ug mga information officers sa pipila ka mga local government units sa Sugbo. (Bombo Jun Salde)
