MANDAUE CITY,CEBU- Gipalig-on sa Mandaue City Government ang serbisyo sa health department pinaagi sa pag-hire ug dugang nga medical personnel, sumala ni Atty. Sally Malig-on, City Administrator.
Matod ni Atty. Malig-on, ang bag-ong pwersa naglakip sa lima ka doctors, diin duha niini mao ang gipuli sa mga ning-resign.
Sa miaging semana, gi-hire na usab sa City Health Office ang mga doctors nga i-deploy sa mga barangay aron masiguro ang medical coverage sa tibuok siyudad.
Gikalipay sa City Administrator nga natuman na ang paghatag ug tambal sa matag barangay, usa ka importante nga lakang padulong sa mas accessible nga serbisyo sa panglawas.
Alang sa sunod nga plano, giingon ni Atty. Malig-on nga gitinguha sa siyudad nga mapalambo ang kapasidad sa paghatag ug doctor sa matag barangay pinaagi sa rotation system, tungod kay limitado pa ang medical staff.
Dugang pa, adunay ipang-hire nga nurses para sa district hospital aron mas mapalig-on ang health services sa tibuok siyudad.
Kini nga inisyatibo nagpakita sa padayon nga determinasyon sa Mandaue City Government sa paghatag ug mas accessible ug epektibong health care sa tanang residente.
