Nagpadayag sa ilang suporta ang Kagamhanang Dakbayan sa Mandaue sa paningkamot sa National Shrine of St. Joseph sa Barangay Centro sa aplikasyon niini isip ideklarar nga Minor Basilica.
Ang mga kadagkuan sa simbahan kay nakigtagbo kang Mandaue City Mayor Thadeo “Jonkie” Ouano, Mandaue City Lone District Rep. Emmarie “Lolypop” Ouano-Dizon ug uban pang opisyal sa dakbayan aron hisgutan ang ilang aplikasyon nga mahimong Minor Basilica ang estado sa simbahan sa dakbayan.
Gipadayag ni Mayor Ouano ang suporta sa dakbayan sa pagpanangpit niini sa pribadong sector aron mas mapadali ang maong aplikasyon sa simbahan.
Ang pagpataas sa status sa simbahan gikan sa pagka National Shrine, diin ang St. Joseph Church sa Mandaue kay bugtong sa tibuok Pilipinas, ngadto sa pagka-Minor Basilica kay maghatag og dugang oportunidad sa turismo dungan sa paglambo sa lokal nga ekonomiya.
Ang pagpadayag og suporta sa kagamhanang dakbayan kay magtugyan og pasalig sa tinguha nga mamahimong ikaduhang Minor Basilica sa Sugbo sunod lang sa Basilica Minore del Sto. Niño de Cebu diin posible ang pagdaghan ang parokyahanon niini ug mga deboto sa syudad.
