Nipasaka og kaso si Edward Ligas ngadto sa Ombudsman-Central Visayas, batok ni Mandaue City Mayor Jonkie Ouano ug sa duha ka brgy. Councilor sa Lungsod sa Compostela nga sila si brgy. Cogon Konsihal Negrido Arioja ug Brgy. Poblacion konsihal Lynn De Guzman Castro karong adlawa, Enero 23.
Ang maong reklamo nagsumikad sa giingong paglapas sa mga balaod batok sa graft ug corrupt practices, ingon man ang ilegal nga pagtudlo sa pwesto ug seryosong misconduct sa serbisyo, diin nag ugat sa gi-ingong Gidawat sila isip trabahante sa Mandaue City Hall samtang active pa sila nga konsihal sa ilang brgy. sa Lungsod sa Compostela Cebu.
Sa gikabutyag ni Ligas atol sa ekslusibong pakighinabi sa Bombo Radyo Cebu Newsteam kaniya, matod niya nga ang hinungdan sa kaso mao ang pagkuha ug pagsuweldo sa usa ka incumbent nga kagawad ubos sa usa ka Contract of Service (COS), butang nga giingong supak sa Local Government Code.
Tungod niini, hugot nga gihangyo ni Ligas sa Ombudsman nga ipaubos sa preventive suspension si Mayor Ouano samtang gihimo ang imbestigasyon aron masiguro nga mapanalipdan ang integridad sa maong kaso.
