Gilusad sa Mandaue City ang labing unang Multi-Hazard Early Warning System (MHEWS) sa tibuok Central Visayas gahapong adlawa, Pebrero 19, 2026.
Ang maong web-based platform, nga bunga sa pakigtambayayong sa Global System for Mobile Communications Association ug software provider nga Komunidad, gidesinyo aron mohatag og real-time nga alerto sa matag barangay bahin sa dagan sa panahon ug uban pang posibleng katalagman.
Pinaagi sa MHEWS, awtomatikong mag-post og updates ang social media page sa Bantay Mandaue-CDRRMO aron magiyahan ang publiko kung kanus-a angayng mangandam sa pagbaha, kusog nga ulan, o taas nga heat index.
Gipasiugdahan kini ni Mayor Thadeo “Jonkie” Ouano isip kabahin sa iyang tinguha nga mapalambo ang pagresponde sa siyudad ug malikayan ang panic panahon sa kalamidad, diin gipasiugdahan usab sa GSMA Innovation Fund ang pundo sa maong proyekto.
