MANDAUE CITY, CEBU-Nagpadayon ang imbistigasyon sa mga sakop sa kapulisan sa dakbayan sa Mandaue dungan sa pagpangita sa responsable sa naglabay sa patayng lawas sa bata sa bakanteng luna sa North Reclamation Area sa Brgy. Subangdaku, Mandaue City.
Matud ni Police Lieutenant Colonel Mercy Villaro, ang tigpamaba sa Mandaue City Police Office nga gibana-banang anaa sa walo o siyam ka bulan ang batang lalaki kinsang gibutang sulod sa shoe box ug gisulod sa color maroon nga bag.
Usa ka concerned citizen ang nanawag sa police station sa Brgy. Center aron i-report ang pagkadiskobre sa fetus sa usa ka bakanteng luna duol sa Northdrive nga nahimutang sa may Ouano Avenue sa NRA.
Subay niini, usa sa mga hagit sa kapulisan sa maong kaso kay walay nakapukos nga CCTV sa gilabayan apan, adunay usa ka establishamento nga ilang gilantawan karon ang mga tanang niagi ug masigpatan ang indibidwal nga nagbitbit sa maong bag.
Hinungdan nga gi-awhag sa opisyal ang mga lumulopyo nga anaa sa duol sa maong gilabayan o sa mga adunay impormasyon sama sa makatudlo sa nanag-iya sa maong gisudlan sa fetus, ipaabot kini sa ilang buhatan ingon man sa mga sakyanan nga adunay dash cam nga posibleng makita ang responsable.
Ug sa higayon nga mailhan na sa kapulisan kung kinsa ang nagbilin sa patayng lawas sa bata, ila kining pasakaan og kasong infanticide.
