CEBU CITY — Nasikop ang usa ka mangihaway og baboy human nga gituohang midunggab sa laing mangihaway sa New Public Market, Ward 1, sa lungsod sa Minglanilla.
Giila ang suspek nga si Primitivo Amagin, 34 anyos, ug residente sa nahisgutang dapit; samtang ang biktima mao si Junard Laureto, 36 anyos, taga-Calajoan, sa susamang lungsod.
Base sa imbestigasyon sa Minglanilla Police Station, nagkasumpaki na daan silang Laureto ug Amagin niadto pang pista.
Matud sa imbestigador nga si Police Senior Master Sergeant Randy Lopez nga mi-order si Laureto og kinilo nga karne ngadto ni Amagin apan wala na kini maigo sa gipangayo niini bisan pa man og gilanan na daan kini.
Kini ang hinungdan nga nalain si Laureto ug wala na hinuon mahinayon sa pag-order.
Apan hilabihan usab ang kasuko ni Amagin ug gikomprontahan niya ang biktima.
Giingong gidunggab sa suspek ang biktima gamit ang butcher knife hangtud naigo ang biktima ug nahabwa, matud pa, ang tinai niini.
Gidala sa tambalanan si Laureto tungod sa kagrabe sa samad-dinunggaban apan nakabsan kini og kinabuhi kadugayan.
Nabalhog sa prisuhan ang suspek ug mag-atubang og kasong murder.
