Gikatakdang tangtangon sa iyang ranggo ang nasudnong boksidor nga si Manny Pacquiao isip ikalima sa World Boxing Council (WBC) Welterweight fighters.
Kini human giangkon ni WBC president Mauricio Sulaiman nga usa ka sayop ang paghatag kang Pacquiao og taas nga puwesto sa maong ranking.
Bisan pa niini, gitugotan sa WBC si Pacquiao nga makigsangka sa American boxer nga si WBC welterweight champion Mario Barrios karong Hulyo 19 sa MGM Grand sa Las Vegas o Hulyo 20, oras sa Pilipinas.
Gipasabot sa WBC president nga subay sa mga regulasyon sa WBC, gitugotan ang Filipino champ nga makaaway alang sa nahisgutang titulo tungod kay nakadawat kini og lisensya gikan sa boxing commission ug nakapasar sa tanang eksaminasyon.
Ang lakang sa WBC nga hatagan og taas nga ranggo ang legendary Filipino boxer ug tugotan siya nga makaaway alang sa maong titulo sa iyang pagbalik sa boxing nakaani na og pagsaway sa boxing community.
Katapusang away sa Filipino icon niadtong 2021 diin gipildi siya ni Cuban boxer Yordenis Ugas sa wala pa niya gianunsyo ang iyang pagretiro sa boxing niadtong Setyembre 29, 2021.
