Nanumpa na si Atty. Melvin Matibag isip bag-ong direktor sa National Bureau of Investigation (NBI), human gipahibalo sa Malacañang niadtong Huwebes, Pebrero 20 ang posisyon niini.
Mohulip si Matibag kang Atty. Angelito Magno, kinsa nagsilbi nga acting NBI chief human mi-resign ang kanhi NBI director nga si Jaime Santiago sa miaging tuig.
Sa usa ka press briefing, si Palace Press Officer Usec. Claire Castro miingon nga wala siya mohatag og mga detalye kon nganong adunay pagbag-o sa liderato ug kanus-a gyud molingkod si Matibag.
Sumala ni Castro, nakita sa Presidente nga kasaligan ug may katakus si Matibag sa pagserbisyo sa gobyerno.
Nagsilbi si Matibag nga Cabinet secretary ni kanhi Presidente Rodrigo Duterte ug secretary-general sa Partido Demokratiko Pilipino–Lakas ng Bayan (PDP-Laban).
Mi-resign siya sa partido niadtong Oktubre 2023 diin nagserbisyo usab siya isip general manager sa Manila International Airport Authority ug presidente ug chief executive officer sa National Transmission Corporation.
