CEBU CITY-Gitumbok sa Office of the Presidential Assistance for the Visayas (OPAV) nga pamulitika ug pagkabadlungon sa mga tawo ang maoy hinungdan kung nganong gibalik ang Enhanced Community Quarantine (ECQ) sa dakbayan sa Sugbo.
Kini subay na sa pamahayag ni Presidente Rodrigo Duterte nga, matud pa, mga ‘suberbiyo’ ang mga Sugbuanon hinungdan nga nisaka ang mga kaso sa COVID-19.
Sa eksklusibong interview sa Bombo Radyo Cebu atol sa tulumanong Bombohanay Bigtime kang OPAV Asst. Secretary Jonjie Gonzales, nagkanayon kini nga ang Cebu City lang maoy adunay problema itandi sa mga kasikbit niining dakbayan sa Metro Cebu.
Matud ni Gonzales nga bisan pa man sa pagpaningkamot sa local government unit ug sa barangay, daghan gihapong mga tawo ang wala nituman sa mga health protocols. Dugang pa niini, gitoohan sa opisyal nga adunay nagsabotahe o gisabotahe si Cebu City Mayor Edgardo Labella sa napahigayong strategic rapid tests sa Cebu City niadtong Mayo hinungdan nga wala nakab-ot ang target.
Gumikan niini,gikalipay sa OPAV ang pagtudlo ni Pres. Duterte ni Environment Sec. Roy Cimatu aron panguluhan ang COVID-19 Task Force sa Cebu ug matabangan ang mga apektado sa pandemic. | via GN
