CEBU CITY-Mopatawag ang Cebu City Council og budget hearing sunod semana arun madungog gikan sa city treasurer kon aduna bay pundo alang sa gisugyot nga P35,000 nga bonus alang sa mga regular ug kaswal nga empleyado ingon man ang elected officials ug P10,000 nga ‘gratuity pay’ alang sa job order personnel.
Sa pakighinabi sa Bombo Radyo Cebu News Team ngadto kang konsehal Noel Wenceslao alang sa gisugyot nga bonus sa City Hall workers nga P35,000, nasayran nga anaa pa kini sa ‘proposal stage’ diin kinahanglan pang tukion pag-ayo sa tibuok usa kini aprobahan sa konseho.
Dugang pa niini nga posible usab nga dili P35,000 ang ihatag, ingon man nga makunhuran pa ang gitagana nga bonus.
Sa pikas bahin, mihatag usab sa iyang habig ang konsehal kabahin sa P10 milyon alang sa ‘bullet proof’ nga sakyanan ni Cebu City Mayor Micheal Rama nga matud pa ni Wenceslao nga kinahanglan kini sa ‘security purposes’ sa Mayor.
Gitataw usab niini nga dili lang ang kasamtangang mayor ang makapahimulos gumikan gihatagan og kahimug-aton sa konsehal nga bisan ang mosunod nga molingkud isip mayor sa Sugbo, makagamit usab.
Ingon man nga kon dili kini maaprobahan sa DILG, dili pud kini mapalit.
