𝐂𝐄𝐁𝐔 𝐂𝐈𝐓𝐘- Nasikop sa Mambaling Police Station ang usa ka Mayuhang human nasakpang nangawat og cellphone sulod sa mini market sa Brgy. Duljo Cebu, kagahapon, Mayo 26, 2025.
Giila ang suspek nga si ‘alyas Daniella’, 30-anyos, mahuyang ug lumad nga taga dakbayan sa Bogo, kasamtangang nagsuroysuroy sa dakbayan sa Sugbo, kinsa nakita sa CCTV nga maoy suspek sa pagpangawat og cellphone.
Sa pakighinabi sa Bombo Newsteam, giangkon sa suspek ang pagpangawat ug miingon nga iyang nakita ang cellphone nga anaa sa lamesa sulod sa mini market ug wala siyay nakitang tawo sulod sa maong tindahan hinungdan nga iya kining gikuha kay grasya kini.
Wala hinuon siya magtuo nga mahimong disgrasya ang maong grasya kay adunay CCTV ang nahisgutang tindahan hinungdan nga nakita ug nailhan siya.
Gipasabot usab sa mahuyang nga human niya kuhaa ang cellphone, iya kining gibaligya sa usa ka kaila sa kantidad nga P1,500.00.
Dugang pa, nalipay siya pag-ayo tungod kay nakakuwarta siya human kini mabaligya ug wala matud pa siya magduha-duha sa pagkuha og tulo ka lalaki isip iyang mga kliyente, nga iyahang gibayaran og P150 ngadto sa P200.
Giangkon usab sa biktima nga nalambigit siya sa paggamit og ilegal nga drugas.
Kasamtangang, gitanggong na siya sa Mambaling Police Station detention facility, samtang nagpaabot ang Kapolisan kon mopasaka ba og kaso ang mga biktima.
