MANDAUE CITY- Patubagon sa Mandaue City Government ang Mandaue City Police Office (MCPO) human mahibaw-i nga duha ka aktibong pulis ang nasikop sa managlahing insidente sa krimen sa dakbayan sa Sugbo.
Sa pakighinabi kang Konsehal Oscar Del Castillo, chairman sa committee on police, fire and penology, nga ang lokal nga kagamhanan moduso og internal nga imbestigasyon sa mga dinakpan.
Gitataw ni Castillo nga mangayo sila og opisyal nga report sa kapolisan aron hingpit nga masabtan ang sirkumstansya sa mga dinakpan.
Kung kahinumduman, nga niadtong Abril 6, si Niesel Arizo Pescante, aktibong pulis nga nadestino sa Police Station 6 sa MCPO ug taga Barangay San Vicente, Liloan, Cebu, nasikop sa buy-bust operation sa Barangay Mambaling, dakbayan sa Sugbo.
Samtang, niadtong Abril 7, si PCpl.Ivan Labra, nadestino sa Police Station 3 sa MCPO, nasikop mga alas 9 sa buntag sa Barangay Sapangdaku, dakbayan sa Sugbo.
Giingong gikulata niya ang usa ka lalaki, gitionan siya og armas ug giluwatan og grabeng hulga.
Sa miaging report, giklaro sa Police Regional Office (PRO) 7 nga wala kini motugot sa sayop nga binuhatan sa ilang mga personnel.
Ang tigpamaba sa PRO 7 nga si PCol. Arvie Aserre Paraon-Bueno nihatag og gibug-aton nga ang balaod parehas nga magamit sa tanan, apil na ang mga sakop sa kapulisan.
