Angay nga hinuklogan ug ikonsederar ang pag-resign sa mga gipang-terminate nga mga board of the directors sa Metropolitan Cebu Water District (MCWD) taliwa sa nadawat nilang pagsaway.
Kini ang gibutyag ni Cebu Provincial Governor Gwendolyn Garcia ngadto sa lima ka mga board members sa MCWD kinsa nagdumili sa pagkanaog sa posisyon bisan paman sa mando ni Cebu City Mayor Edgardo Labella.
Nagkanayon si Garcia nga kung aduna pay delikadesa ang nahisgutang mga opisyal, mas maayong mo-resign kini sanglit wala maka-uyon ang local chief executives kanila.
Dugang pa ni Garcia nga kung mahimo, ipareha sa uban pang mga lider sa Japan diin big deal alang kanila ang delikadesa.
Kahinumduman nga gipadal-an niadtong nakalabay nga mga adlaw og Notice of Termination ni Mayor Labella silang MCWD Chairman Joel Marie Yu, Vice Chairman Ralph Sevilla, Secretary Cecilia Adlawan, ug mga miyembro sa board nga silang Procopio Fernandez ug Augustus Pe.
Apan ning bag-ohay lang, nagdumili ang lima sa pagbuhi sa ilang posisyon.
‘NAMULITIKA?’
Samtang nakita ni Cebu City Councilor Alvin Dizon nga dili solusyon ang pagtaktak ni Mayor Edgardo Labella sa mga member sa board sa MCWD.
Usa sa gitan-aw nga motibo sa konsehal sa pagpanaktak sa mayor mao ang pamulitika. Kini gumikan kay nadunggan ni Dizon nga, matud pa, ipamuli sa mga gipangterminate nga board members, mga pangan ra usab nga anaa sa natad sa pulitika.
