Magtanyag ang Kagamhanang Lalawigan sa Sugbo og Medical Scholarships sa mga nangandoy mamahimong doktor nga andam muserbisyo sa mga pampublikong tambalanan sa probinsya.
Kini ang sugyot nga inisyatiba ni Cebu Capitol Public Health Consultant Dr. Elisse Nicole “Nikki” Catalan nga nagsubay sa priyoridad nga programa sa administrasyon ni Provincial Govenor Pamela “Pam’ Baricuatro nga mapabaskog ang serbisyong panglawas sa Sugbo.
Matod pa nga ang Kapitolyo kay nakigtambayayong na sa Cebu Normal University–Vicente Sotto Memorial Medical Center College of Medicine (CNU-VSMMC COM) aron sa pagpatuman sa scholarship program sa mga medical students.
Ang Provincial Board Committee on Public Health nga gipangulohan ni Boarad Member Dr. Stanley Caminero kay nakigtagbo na sa mga opisyales sa CNU-VSMMC COM sa ilang agreement in principle sa pagabuhatong scholarship program nga puhon muserbisyo sa mga provincial ug district hospitals nga gidumala sa Kapitolyo.
Gisaysay pa ni Dr. Catalan nga ang pagpundo sa medical education kay usa ka direktang pamuhuman sa kaugmaon sa serbisyong panglawas sa Sugbo. Pinaagi niini, ang Kapitolo nanghinaot nga adunay daghang Sugboanon nga makabenepisyo sa malungtarong epekto niini sa episyente, accesible, ug dekalidad nga healthcare service sa probinsya.
