Men’s baseball team, walay pildi gihapon sa SEA Games

Nagpabiling walay pildi ang men’s baseball team sa nasud sa ika-33 nga Southeast Asian Games.

Kini nahitabo human nila gipildi ang Malaysia og 21-0 sa lima ka innings sa usa ka dula nga gipahigayon sa Pathum Thani, Thailand.

Sa gipaambit ni Coach Orlando Binarao nga ilang giisip ang matag dula isip usa ka championship game.

Gidugang niini nga dili sila morelax hangtod nga dili nila makuha ang gold medal.

Una nilang gipildi ang Indonesia og 14-0 ug Singapore og 17-3 sa dili pa moatubang sa Vietnam karong adlawa, Disyembre 9.

Ang single round elimination matapos sa Huwebes, Disyembre 11 diin ang duha ka top teams mag-atbang alang sa gold medal sa Biyernes.