CEBU CITY-Gipahibalo sa Metropolitan Cebu Water District (MCWD) nga makita na gayud ang epekto sa dry spell condition sa Sugbo ilabi na sa mga surface water sources sama na lang sa mga dam ng gikuha-an nila og supply.
Gibutyag ni Minerva Gerodias, ang tigpamaba sa MCWD nga ang Jaclupan dam kay mikunhod na og 19,000 cubic meter gikan sa normal nga 30,000 cubic meter, ang Lusaran gikan sa 30,000 cubic meter kay anaa na lang sa 21,000 cubic meter ang ma-supply, Buhisan dam nga gikan sa 5,500 cubic meter kay anaa na lang sa 4,000 cubic meter, samtang ang sapa sa lungsod sa Compostela nga kuha-an usab nila og tubig kay anaa na lang sa 5,000 cubic meter gikan sa 10,000 cubic meter.
Matud pa, mikunhod na ang water level sa mga naasoy nga dam hinungdan nga lauman na gayud ang pagkunhod usab sa ma-produce nga tubig sa MCWD.
Gisiguro ni Gerodias nga naningkamot ang MCWD nga masugdan na ang dessalination project nga nahimutang sa Barangay Mambaling sa dakbayan sa Sugbo, ingon man sa dakbayan sa Mandaue, arun nga dili mag-problema kung adunay pagkunhod sa supply sa tubig.
Sa pagkakarun, gihangyo na lang niini ang mga kunsomidor sa MCWD nga sa matag ‘off-peak hours’ o panahon sa kagabhi-on, mag-pondo og tubig gumikan kay ilaha na karung gi-balansi ang pag-distribute sa tubig arun nga dili hilabihan nga maapektohan, ilabi na kadtong mga elevated areas.
