Nanawagan sa mga awtoridad ang duha ka Cebu-based development worker nga giingong gidagit sa wala mailhing mga tawo, nga paspasan ang imbestigasyon ug ilhon ang nagpaluyo sa ilang pinugos nga pagkawala.
Kini human si Armand Dayoha, 27, ug ang iyang pangasaw-unon nga si Dyan Gumanao, 28, niingon nga wala sila gipasakitan sa lawas sulod sa unom ka adlaw nga sila gitanggong, apan nakasinati sila og emotional ug psychological torture.
Matod ni Gumanao, siya ug si Dayoha gisukit-sukit ug gipangutana kon miyembro ba sila sa teroristang grupo.
Kung kahinumduamn nga sila si Gumanao ug Dayoha na-missing niadtong Enero 10 human sila giingong gipugos sa pagsakay sa usa ka sport utility vehicle sa ilang pag-abot sa Pier 6 sa dakbayan sa Sugbo human sa Christmas break uban sa ilang mga pamilya sa Mindanao, ug niadtong Enero 16, gibiyaan sa ilang mga abductor sa usa ka resort sa lungsod sa Carmen, 41 kilometros amihanan sa dakbayan sa Sugbo.
