CEBU CITY — Susama nga wala na’y madoolan ang lumulopyo sa Sitio Basubas, Brgy. Tipolo dakbayan sa Mandaue human nga mismong ang kapitan matud pa sa ilang baranggay ang wala mitabang kanila ingon man si Mayor Jonas Cortes.
Kini ang pamahayag ni Floramae Arong, usa sa mga reklamante nga midangop na sa Bombo Radyo aron mangayo og tabang.
Una na nga nasayran nga gikoral na og barbed wire fence ang ilang lugar sa nagpailang tag-iya nga si Marilyn Basubas ug matud pa nagdala kini og gwardiya og ipapusil pa sila.
Misaad usab ang naasoy nga si Basubas nga mubalik kini og koralon na sila og sin.
Hinoon, duna’y titulo nga gipakita nila ang nanangkon nga matud pa tag-iya ug naa pay fencing permit apan gikwesyon kini sa mga residente gumikan kay sa dihang ila kining gisusi sa DENR nakasuwat sa titulo nga ang yuta nakapangan og “Hacienda de Mandaue” ug ang dokumento nga nakita sa mga residente nga gikan sa giingong tag-iya ang naa matud pa authority nga gikan sa Quezon City.
Boot karon sa mga residente nga mahiluna lang sila og tarong ug dili lang sila i-harass.
Samtang padayon nga gikab-ot sa Bombo Radyo Cebu ang habig ni Marilyn ug Mayor Cortes nga mao matud pay nagsugo nga papahawaon sila. Abli kanunay ang sibyaan sa ilang tubag.
