GUJARAT INDIA-Usa sa labing gikahadlokan nga mga mananap sa tawo mao ang buaya ug kon makita nimo, seguradong modagan gyud ka.
Apan, unsay buhaton nimo kon momata ka ug makakita ka ug buaya nga nagpabugnaw sa imong balay?
Mao kini ang kahimtang karon sa siyudad sa Vadodara sa estado sa Gujarat sa India.
Nahitabo kini human mi-awas ang suba nunot sa sunodsunod nga mga adlaw sa pagbunok sa ulan sa miaging semana.
Ang 17-kilometros nga gitas-on nga Vishwamitri River maoy pinuy-anan sa gatosan ka buaya sa tab-ang nga tubig.
Naanad na ang mga tawo nga nagpuyo sa bukana sa suba nga adunay mga buaya nga mopaduol sa karsada panahon sa ting-uwan, apan lahi kaayo ang sitwasyon karong tuiga tungod kay gawas nga mas daghan, anaa kini sa mga residential areas.
Niadtong Agosto 27-29, kapin sa 20 kanila ang gidakop sa mga otoridad samtang anaa sa kabalayan.
Sumala sa Vadodara Range Forest Office, ang pinakagamay anaa sa duha ka tiil ang gitas-on samtang ang kinadak-an anaa sa14 ka tiil ang gitas-on.
Sukad sa miaging semana, halos walay tawo nga makatulog og maayo tungod sa mga buaya nga nagkamang sa karsada, nagsaka sa atop sa mga balay, naglangoylangoy sa mga kanal duol sa mga balay samtang adunay gipang-pang-it nga ubang mga mananap sama sa iro, iring ug bisan sa baka!
Hangtod karon, gipasidan-an ang katawhan sa hulga sa maong mga mananap samtang padayong gipangita sa mga awtoridad.
