Importante nga tun-an sa mga batan-on ang kasaysayan sa Martial Law aron masabtan nila ang mga panghitabo ug mga leksyon gikan sa maong mangiob nga panahon, sumala sa usa ka eksperto sa kasaysayan subay sa pagsaulog sa ika-54 nga anibersaryo niini karong adlawa.
Sa usa ka interbyu sa Bombo Radyo kang Prof. Mike Pante, Associate Professor sa Department of History sa Ateneo de Manila University, iyang gipasabot nga ang panahon sa Martial Law usa sa labing ngitngit nga bahin sa kasaysayan sa Pilipinas tungod kay hugot nga gikontrol sa administrasyon ang nagkalain-laing aspeto sa kinabuhi sa mga Pilipino.
Sumala ni Pante, atol sa panahon sa Balaod Militar, limitado ang kagawasan sa media tungod kay ang pipila ka mga estasyon gisirhan o gisuspinde, samtang kadtong nagpadayon sa pagreport kinahanglan nga moatubang sa hugot nga kontrol sa gobyerno.
Gipahayag usab niya nga importante nga tudloan ang mga batan-on bahin sa Martial Law aron kini magsilbing pahinumdom kanila ug matabangan sila nga masabtan ang kamahinungdanon sa kagawasan sa pagpahayag, kagawasan sa prensa ug uban pang mga katungod sa demokrasya.
