Kuwang sa kusog ang mga ebidensya ug testimonya prosecution batok sa depensa sa ika-30 nga adlaw sa nagpadayon nga impeachment trial batok kang VP Sara Duterte.
Kini ang gipaambit ni Atty. Rameses Victorius Gatchalian Villagonzalo, usa ka ICC accredited lawyer nga ang bag-ohay nga mga pagdungog mipabor sa depensa tungod sa kakuwang sa igong gibug-aton sa testimonya ug ebidensya sa prosecution.
Matod ni Atty. Villagonzalo, ang unang saksi sa prosecution nagpresentar lamang og mga dokumento apan walay personal nga kahibalo kon giunsa paghimo ang mga rekord o mga talaan niini busa, ang testimonya wala giisip nga mahinungdanon.
Dugang pa niya nga ang testimonya sa ikaduhang saksi nga naghisgot bahin sa mga armas walay daotang epekto o “harmless” alang sa depensa.
Gipunting sa abogado nga ang mga armas nga gihisgutan dili mahimong iklasipikar nga “unexplained wealth” o bahandi nga dili matino ang gigikanan, tungod kay kini adunay lisensya ug legal nga narehistro.
Tungod niining mga kakulangan sa bahin sa prosecution, nagtuo si Atty. Villagonzalo nga nakakuha og dakong bentaha ang depensa sa kasamtangang mga proseso sa kaso.
