CENTRAL VISAYAS-Nipahinumdom ang Department of Education sa Central Visayas (Deped-7) sa mga graduating students sa pag-obserbar sa saktong pamatasan sa ilang pagdawat sa ilang mga diploma sa entablado atol sa gradwasyon.
Kini ang gihatagan ug gibug-atun ni Dr. Salustiano Jimenez, ang Regional Director sa Dep-ed 7, nga kutob sa mahimo, ang graduation ceremonies kinahanglang saulogon sa pormal nga yano apan halandumong solemnidad nga paagi.
Gihimo kini nga pamahayag sa opisyal, atul sa pakighnabi sa Bombo Newsteam, subay sa mga video nga anaa karun sa social media nga adunay mga gradwado nga naghimo og mga stunts sama sa push ups ug twerks human makadawat sa ilang mga diploma o awards.
Matud ni Jimenez nga adunay ubang mga kalihukan nga may kalabutan sa graduation diin ang mga gradwado mahimong magsaulog sa usa ka festive nga paagi, sama sa graduation balls.
Una niini, adunay usa ka viral nga video, nga ang mga estudyante makita nga misaka sa entablado aron makadawat sa ilang mga diploma.
Human madawat ang ilang mga sertipiko, ang mga estudyante mosayaw dayon sa entablado, uban ang pipila nga nagpasundayag nga mga lakang gikan sa TikTok samtang ang uban nag-twerk sa salog.
