Gimandoan sa City of Talisay Traffic Operation and Development Authority (CT-TODA) ang tanang nanag-iya og mga gubaon nga sakyanan nga nakaparada daplin sa dalan sa Barangay Jaclupan nga kuhaon kini sulod sa pipila ka adlaw.
Kini nga lakang kabahin sa gipahigayon nga road clearing operation ubos sa pagdumala ni Lt. Col. Homobuno Sayon, uban ang pwersa sa kapulisan sa Talisay, samtang nagpatrolya sila sa Toledo Wharf Road.
Gitumong niini nga maseguro ang kahapsay ug kalimpyo sa mga nag-unang dalan sa barangay aron dili makababag sa dagan sa trapiko ug sa mga lumulupyo.
Nipahamatngon usab ang CT-TODA nga ang mga tag-iya nga mapakyas sa pagtangtang sa ilang mga sakyanan mag-atubang og dagkong multa ug bayranan ngadto sa gobyerno, o posible gani nga mag-atubang og kaso pinasubay sa balaod.
Mapasalamaton hinuon ang maong buhatan sa ubang mga nanag-iya og sakyanan nga daling nikooperar ug nikuha sa ilang mga kabtangan sa wala pa ang gitagal nga panahon.
Sa pagkakaron, makita na ang dakong kausaban ug kahinlo sa kadalanan sa Jaclupan tungod sa malampusong koordinasyon tali sa mga awtoridad ug sa publiko.
