CEBU CITY- Nagmalampuson ang gipahigayon nga Seminar on Anti-Cybercrime and Online Scams nga gipangulohan ni Police Colonel Antonietto Cañete uban si Police Lt. Mark Anthony Fredeluces, Team Leader sa Cebu Cyber Response Team, Regional Anti-Cybercrime Unit (RACU)-7, isip mga guest lecturer.
Diin tumong sa seminar aron sa pagpalig-on sa hiniusang paningkamot sa pagsumpo sa mga hulga sa cyber ug pagpanalipod sa komunidad.
Sama nalang sa pagtutok sa pagpahanas sa mga personahe sa gikinahanglang kahanas ug kahibalo sa pagsumpo sa online scam, pagpanalipod sa mga indibidwal gikan sa cyber predator, ug pagsuporta sa anti-POGO (Philippine Offshore Gaming Operator) nga mga operasyon sulod sa dakbayan.
Samtang sa pikas bahin, gipasalig ni Cebu City Police Office City Director Police Col. Antonietto Cañete, nga luwas ang mga Sugboanon sa mga krimen taliwa sa mga sunod-sunod nga insidente sa pagpamusil ug patay nga natala sa mga miaging adlaw.
Matud pa ni Col. Cañete nga dako og tabang ang paspas nga pagtrabaho sa mga hepe sa police station sa dakbayan alang sa pag imbestigar ug pagtino sa mga hinungdan sa mga pagpamusil sa dakbayan.
Dugang pa, nga gipahingusgan ug doblehon nila ang police visibility hilabi na nga nagsingabot na ang mga dagkong kalihokan sa dakbayan sa umaabot nga mga adlaw.
Gihatagan og gibug-aton sa opisyal nga padayun nila nga sumpu-on ang mga badlongon sa katilingban ug pahingusgan ang prosekusyon sa mga kriminal.
