CEBU CITY — Gihingusgan sa mga manlalaban sa Sugbo nga mahan-ay ang gipropose nga ‘Lawyers’ Protection Program’ nga una unyang mapatuman sa tibuok Pilipinas sa panahon nga maaprubahan og mapatuman.
Gihimug-atan ni Atty. Cecilia Adlawan, usa sa mga proponents sa maong programa nga subay sa nahitabong pagpatay sa mga manlalaban, gikinahanglan na gyud ang aksiyon sa maong mga insidente og dili kutob lang sa pagkondenar sa insidente.
Lakip sa anaa sa maong proposal mao ang pagmontar og hotline nga 24/7 nga abli alang sa mga lawyers nga makapangayo og taban sa mga hingtungdang ahensiya aron makumpirmar og maaksiyunan ang mga hulga sa kinabuhi sa manlalaban.
Katuyuan usab niini ang paghatag og giya sa mga manlalaban ilabi na sa adunay hulga, nga malikayan ang mga posibleng krimen nga mahitabo.
Gawas sa maong mga pama-agi plano usab nga i-level up ang paghatag og tabang sa mga manlalaban pina-agi sa pagbutang unya og ‘app’ alang sa dali nga pagmonitor og paghatag og tabang sa mga lawyers.
Samtang giangkon ni Atty. Adlawan nga naka-apekto sa pipila ka mga manlalaban ang nahitabong pagpatay sa ubang kakaubanan.
Gani lakip sa gikonsiderar sa usa ka abogado ang pagpili sa kaso nga dawaton apan wala kini magpasabot nga dili trabahuon sa usa ka manlalaban ang ilang trabaho nga modepensa sa mga nagkinahanglan.
Subay niini, giklaro ni Atty. Adlawan nga kabahin sa ilang trabaho isip abogado ang pagdepensa sa kliyente o sa mga nagkinahanglan sanglit dili usab mapatigayon ang kaso kung wala ang duha ka partido sa mga naglangkob sa kaso. (Bombo Glenda Sabenorio)
