Nagpakita og panaghiusa ang pipila ka nasod sa Middle East sa ilang hugot nga pagkondena sa mga pag-atake nga gilambigit sa Iran.
Sa usa ka hiniusang pahayag nga gipagawas sa United Arab Emirates, Bahrain, Saudi Arabia, Qatar ug Jordan, ilang giingong ang maong aksyon usa ka klarong paglapas sa soberanya ug hulga sa kalinaw ug kalig-on sa rehiyon.
Sumala sa pahayag, dili lamang mga kabtangan nga may kalabutan sa Estados Unidos ang naapektuhan sa mga airstrike, kundili naapil usab ang kritikal nga imprastraktura sa pipila ka nasod sa rehiyon, nga nagdala og dakong kabalaka sa seguridad.
Gipasiugda usab sa maong mga nasod ang ilang kasubo sa papel sa Iraq, nga ilang giakusahan sa pagpabaya sa pagtugot sa mga armadong grupo nga gamiton ang ilang teritoryo isip launching point sa mga pag-atake.
Matud pa nila, kini nga kahimtang nagpasamot sa tensyon ug mahimong mosangpot sa mas lapad nga kagubot sa Middle East.
Nanawagan ang maong mga nasod sa pagpugong sa tensyon ug pagpalig-on sa diplomasya aron malikayan ang dugang nga eskalasyon sa panagbangi.
