Cebu City– Gipahimangnu-an ni Department of Foreign Affairs Spokesperson Robespierre Bolivar ang mga Pilipino nga dunay mga kabanay nga tua karon sa Las Vegas Nevada nga magkigalayon sa konsulado sa Pilipinas sa Los Angeles alang sa monitoring.
Matud ni Bolivar nga kasamtangan karon nga nagpahigayon ug head count ang konsulado sa Los Angeles diin sakop niini ang Las Vegas sa kapin 131,000 ka mga Pinoy sa maong estado.
Kini aron masuta kung dunay Pinoy nga namatay o naangol atol sa maong insidente. Matud ni Bolivar nga mas madali kung ang mga Pinoy mismo sa Las Vegas maoy mukontak sa embahada aron madali ang monitoring.
Sa laing bahin gibutyag ni Bolivar nga padayon nilang giberipikar ang impormasyon nga anaa sa Pilipinas si Marilou Dandley, ang girlfriend sa suspect nga si Stephen Paddock sa dihang nahitabo ang insidente sa Las Vegas apan milarga man balik kini human nasayran ang nahitabo sa iyahang uyab.
Matud ni Bolivar nga hangtud karon dili pa nila makumpirmar ang origin ni Dandley taliwala sa ninggawas nga usa ka Pilipino sanglit wala pa silay record niini sa pagkakaron.
