Nitaho ang Kontra Daya ug Vote Report PH nga mga grupo sa mga problema nga nahitabo atol sa 2025 Election, diin sa unang upat ka oras ilang natala ang mga malfunctions sa automated counting machine (ACM) ug uban pang problema nga may kalabutan sa eleksyon.
Matod sa Vote Report PH, pipila ka mga botante ang nadistino sa mga presinto nga lisod agian, sama niadtong anaa sa ikaduhang andana sa mga edipisyo, sa pipila ka bahin sa Metro Manila.
Dugang pa, adunay mga insidente sa paglangan sa pagboto tungod sa mga teknikal nga problema sa mga ACM sa lain-laing mga presinto.
May mga reklamo usab sa mga botante nga dunay mga balota nga gimarkahan og overvoting sa makina bisan og sakto ang gidaghanon sa mga kandidato ug nag-amping ang shading sa mga sirkulo hinungdan nga wala maihap ang pipila ka boto.
Gitawagan ni Prof. Danilo Arao, convenor sa Kontra Daya, ngadto sa Commission on Elections (COMELEC) aron matubag dayon kining mga insidente.
Ang Kontra Daya ug Vote Report PH nag-abli usab og vote monitoring center aron makadawat og mga report sa mga iregularidad sa eleksyon sama sa vote-buying, harassment, ug machine malfunctions.
