Gipasigarbo sa Houthi rebel sa Yemen ang ilang sunod-sunod ug malampusong pag-atake gamit ang mga ballistic missile, cruise missile, ug mga drone nga nagpuntirya sa sensitibong mga lugar sa Saudi Arabia.
Matud ni Yahya al-Sarea, ang tigpamaba sa militar sa Houthi, gipuntirya sa ilang operasyon ang kaulohang siyudad sa Saudi nga Riyadh, lakip na ang pasilidad sa oil giant nga Aramco sa lungsod sa Yanbu.
Tungod sa maong insidente ug sa mga nadiskubrehang pagpanghulga sa kahanginan, nakasinati og pagkalangan ang daghang mga biyahe sa eroplano, diin nakita usab ang itom nga aso ug madungog ang mga buto duol sa mga dagkong tugpahanan sa lugar.
Giangkon sa grupo nga ang maong pag-atake usa ka pagbalos o “retaliation” sa nagpadayon nga mga operasyon ug airstrike sa militar sa Saudi Arabia batok sa Yemen.
Gihatagan og gibug-aton sa mga Houthi nga magpadayon ang ilang mga susamang aksyon samtang wala pa nahunong ang agresyon ug ang blockade sa ilang nasud.
Samtang, gipahibalo sa Saudi-led coalition ug sa ilang air defenses nga ilang napugngan ug naguba ang bahin sa mga gipanglusad nga missile ug drone ayha pa man kini nakaabot sa ilang saktong tungasonon nga target.
