CEBU CITY — Gikalipay ni Cebu City Councilor Joel Garganera, ang Emergency Operations Center (EOC) Head sa Dakbayan sa Sugbo ang kasamtangang kahimtang sa Covid-19.
Gibutyag sa konsehal nga sa nakalabay’ng duha ka adlaw, karon lang nahitabo nga naa sa safe zone ang mga pampubliko ug pribadong tambalanan sa Dakbayan.
Kini lamang nagpasabot nga gamay ang occupancy rate ug gani, naa sa 24 percent ang kinatibuk-ang porsyente sa occupancy rate sa mga tambalanan.
Dako matud pa kini og kalahian kaniadto ingun man sukwahi sa sitwasyon sa kaulohan.
Dugang pa ni Garganera nga niubos na usab ang aktibong kaso sa Dakbayan sa Covid-19 samtang “manageable” lamang ang mga ihap sa mga bag-ong kaso.
Apan giklaro niini nga dili angayang magkumpyansa busa kinahanglan sa gihapon nga padayong mutuman sa lagda sa kwarantina.
Samtang gitataw niini nga taas ang agian sa vaccination program sa Syudad apan malaumon kini nga mahuman og bakuna ang mga Sugbuanon.
Base sa case bulletin sa Department of Health (DOH)-7 niadtong Abril 24, anaa sa 23,098 ang mga natalang kaso sa COVID-19 sa dakbayan sa Sugbo diin 898 ang active cases niini.
Nisaka ngadto sa 21,371 ang mga naayo sa sakit samtang 829 ka mga pasyente usab ang nitaliwan.
