CENTRAL VISAYAS-Gipasalig sa Police Regional Office sa Central Visayas (PRO-7) nga andam na ang ilang 6,000 ka personnel alang sa Semana Santa 2024, nga ipakatap sugod sa Domingo, Marso 24.
Ang tumong mao ang pagsiguro sa kaluwasan sa mga simbahan, transport hubs, pantalan, ug tourist spots.
Apil na niini ang kooperasyon sa Philippine National Police (PNP), Armed Forces of the Philippines (AFP), Bureau of Fire Protection (BFP), ug uban pang grupo.
Kini bisan pa man nga walay hulga sa Rehiyon, pabiling alerto ang mga otoridad atol sa relihiyosong semana santa.
Matud ni Police Lt.Col. Gerard Ace Pelare, ang tigpamaba sa PRO7 nga kinahanglang motuman ang tanan sa balaod panahon sa Semana Santa, lakip na ang paglikay sa mga ilegal nga kalihokan sama sa sabong.
Giawhag sa opisyal ang tanan nga mosunod sa guidelines alang sa luwas ug legal nga selebrasyon.
Sa laing bahin, si Abel Jan V. Lomboy, information officer sa Philippine Coast Guard (PCG) District Central Visayas, nihatag og impormasyon sa kaandam sa PCG alang sa holiday rush.
Mokabat sa 800 ka mga personahe, lakip ang K-9 units ug medical teams, ang ibutang sa mga pantalan ug adunay mga help desks alang sa mga pasahero, ug ang mga sea marshals maoy mosiguro sa kaluwasan sa barko.
Gipahinumdoman sa mga otoridad ang mga pasahero nga dili magdala og mga delikadong butang.
