Misis nga nanglabay og humidifier sa promodiser napriso

CEBU CITY — Natanggong sa prisuhan ang usa ka babaye human milabay og humidifier ngadto sa usa ka promodiser sulod sa usa ka dakong mall sa Mabolo, Cebu City.

Nadakpan kagabii ang suspek nga si Medilina Berja Yamasaki, 33 anyos, human mireport sa kapulisan ang biktima nga si Jennifer Fabillar, 26 anyos.

Makita sa nag-viral nga video sa social media nga naglalis ang suspek ngadto sa biktima, kuyog ang iyang hinigugma nga usa ka Hapon ug adunay bitbit nga bata.

Matud ni Police Chief Master Sergeant Roland Camilo sa Mabolo Police Station nga nahimong init ang panaglalis gumikan kay nagkaproblema ang tester sa humidifier.

Tungod sa tumang kalagot, gilabay ni Yamasaki ang humidifier ngadto ni Fabillar.

Nakaangkon ang biktima og bun-og ug samad sa tuo nga bahin sa iyang mata.

Dugang pa ni Camilo nga mihulga si Yamasaki nga iyang patyon si Fabillar hangtud nga nagkagrabe ang komosyon.

Miresponde dayon ang gwardya sa mall human nakabati sa komosyon ug miresulta kini sa pagkasikop sa dinakpan.

Mag-atubang si Yamasaki og kasong physical injury ug posible pang madugangan gumikan kay pursigo ang biktima sa pagpasaka og kaso batok kaniya.

Sa kasamtangan, wala pa mihatag og reaksyon ang dinakpan kalabot sa maong insidente.