Gikonsiderar sa Metropolitan Manila Development Authority (MMDA) ang legal nga aksyon batok sa transport group nga Manibela nunot sa pag-atake sa usa ka raliyista sa traffic enforcer atol sa kataas sa transport strike.
Sa press conference kahapong adlawa, Marso 27, si MMDA chairperson Romando Artes niingon nga ang gihimo sa mga nagprotesta makonsiderar nga pag-atake sa usa ka person of authority nga nagtuman lang sa iyang katungdanan.
Ang opisyal sa MMDA namahayag usab nga ang maong pag-atake kay silotan sa balaod.
Sa pagkakaron, wala pay komento ang habig ni Manibela kalabot sa planong ligal nga aksyon sa MMDA.
Kahinumduman nga nagsugod ang Manibela og 3 ka adlaw nga transport strike niadtong Lunes isip protesta sa giingong sayop nga datos sa mga consolidated jeepney operators sa Public utility vehicle modernization program sa gobyerno.
Niadtong Miyerkules, ang mga traffic enforcer sa MMDA nagtiket sa 15 ka mga jeepney gikan sa Manibela tungod sa pagbabag sa usa ka bahin sa Connecticut Street eskina EDSA, nga nisangpot sa panagsungi sa duha ka partido.
