Nipasalig si Speaker Martin Romualdez sa Philippine Air Force (PAF) ug sa tibuok Armed Forces of the Philippines nga ang Kamara gipasiguro nga ang ilang modernization ug welfare programs adunay igo nga pundo sa annual national budget.
Kini mao’y gitumbok sa lider sa Kamara dungan sa ika-77 nga anibersaryo sa PAF.
Matod niya, nagkahiusa ang tibuok Kamara sa pagsuporta kang Presidente Ferdinand R. Marcos Jr. sa tibuok armadong kusog.
Gitataw ni Speaker Romualdez nga nasayod ang gobyerno sa pagbag-o sa kapabilidad sa depensa, ilabi na sa kagamitan.
Busa matud niya importante nga ipatuman ang modernization program sa AFP aron maseguro nga mahatagan sila sa pinakabag-o nga ekipo aron matubag ang nagkadaiyang hagit.
Diin lakip niini ang mga bag-ong modernong eroplano, radar system ug kagamitan nga magamit sa pagpanalipod sa soberanya ug integridad sa teritoryo.
Gawas sa mga ekipo, si Romualdez niingon nga gihatagan usab og bili sa gobyerno ang kaayohan sa mga sundalo pinaagi sa mga welfare programs, dili lang alang kanila apan lakip na sa ilang mga pamilya.
Sa samang higayon, ang pangu sa Kamara mihatag og pag-ila, pagdayeg ug pagpasalamat sa mga personahe sa Air Force alang sa ilang dedikasyon, kaisog ug dili hinakog nga pagserbisyo dili lamang sa pagpanalipod sa seguridad sa nasud kon dili sa pagtubag sa humanitarian ug disaster operations.
