CEBU CITY– Gikompirmar ni Victor Caindec, ang regional director sa Land Transportation Office (LTO-7) nga dunay kausaban sa gipatuman sa Department of Transportation (DOtr) nga pagdili sa pagsakay sa motor o ang gitawag nga ‘backriding’ agi og precautionary measure batok sa COVID-19.
Kini human usab sa pagpaubos og lockdown sa Luzon ug ‘Community Quarantine’ sa Cebu City ug sa ubang region.
Matud ni Caindec atol sa tulumanong Zona Libre sa Bombo Radyo Cebu nga mikonsiderar na ang DOtr sa motorcycle back riding apan alang lamang sa mga immediate family— kini mao ang bana, asawa ug anak. Kung ugaling maabtan kini sa inspection, kinahanglan lamang nga magpakita sa ilang ID o dokumento nga magpamatuod nga sila duna’y relasyon. Ug alang sa mga minyo, angayan makapakita kini og papel o ID nga sila kasado.
Gitataw sa direktor nga wala nalakip niini ang mag-uyab o nagtipon sanglit kung wala kini dokumento nga mapakita, mamahimo kining ma-abusar sa uban.
Tumong niini nga ma-obserbar gyud ang social distancing, ug dili boot pa sa LTO-7 nga muabot pa sa ‘enhance community quarantine’ ang Sugbo sanglit mas lisod matud pa kini gumikan kay wala nama’y tugutan nga mga transportasyon nianang higayona.
